ጥቁር ነኝ … ነገር ግን ውብ ነኝ (ሙሉጌታ አሻግሬ)

mulugetaashagre@yahoo.com

ማህበር እየደገሰች ዘመድ የምትሰበስበዋ አክስቴ ‘አገር የጋራ ነው ሃይማኖት የግል ነው’ ትላለች።  ይህን አባባል ለአክስቴ መስጠቴ አይደለም ሙስና እንዳይሆንብኝ።  ህዝቡ ሁሉ እንደዛ ይላል። አክስቴ ምን ታድርግ መስመርና አብዮት የተባሉ ሰው ሰራሽ ጭራቆች ወንድሞቿን በልተውባታል። ይህ አባባል በፖለቲካ ምክንያት እሳት እና ጭድ  የሆኑ ቀሪ ዘመዶቿ የተለመደውን ንትርክ እንዳይጀምሩ  የምትጠቀምበት ዘዴ ነው። እኔ ግን ስተረጉመው ‘ዝምድና የጋራ ነው ፖለቲካ የግል ነው’ ማለቷ ነበር።  በአክስቴ እምነት ፖለቲካ ጥሩ አይደለም። ሞት ያስከትላል።

ግን ሃይማኖትና ፖለቲካ እውነት ለየቅል ናቸው? ይህን አስተያየት ለመፃፍ ያነሳሳኝ ሰሞኑን አንድ ወዳጄ ጀባ ያለኝ የስብከት ሊንክ ነው። (http://www.youtube.com/watch?v=wU9bWYu6vU8) ምንም እንኳን እንደአባባሉ ሃይማኖት የግል አገር የጋራ ቢሆንም የወያኔ ገዥ ቡድን አገርም የእነርሱ፤ ሃይማኖትም የእነርሱ እንደሆነ ህቅ እስኪለን ድረስ አሳይተውናል።

የእስለምና መሪዎች ሹመት በቀበሌ ምርጫ ካልሆነ ምኑን ሃይማኖት ሆነው ሊሉን ዳርዳር ያሉ የወያኔ ካድሬዎችን ታዝበናል። ማንን ፈርተው እንደተዉት ባይታወቅም  ‘የመጅሊስ ተመራጮች ምርጫ ቦርድ መመዝገብ አለባቸው’  የሚል የደደቢት ቀጭን ትዕዛዝ ይተላለፋል ብዬም ጠብቄ ነበር። ኦርቶዶክሱንም ቢሆን ያልተመቻቸውን ሽረው፣ የተመቻቸውን ሾመው ፣ ኽረ ወግ እየተናደ ነው ብለው ቅሬታ ያሰሙ አባቶችን ደብድበውና አስደብድበው ሲኖዶሱ የእነሱን መስመር የሚከተል እንዲሆን ሰርተዋል። በአደባባይ በመውጣት ሚዲያ በመጠቀምም የኦርቶዶክስን አከርካሪ ሰብረናል ብለዋል። ስለዚህ ፖለቲካ ከእኛ በላይ ለአሳር ያሉት የወያኔ ገዥ ቡድን አባላት ይህን ካደረጉ እና ከተናገሩ፤ የእኔ የተራው ዜጋ ሁለት መስመር አስተያየት ሃይማኖት እና ፖለቲካን እንደማታቀላቅል እጅግ እርግጠኛ ነኝ።

ስብከቱ ከአንድ ሰዓት በላይ ነው። ትዕግስቴ አፍንጫዬ ላይ እንደሆነ የሚያውቀው ወዳጄ ግን አዳራ ጨርሰህ እንድትሰማው ብሎ መክሮኝ ነበር፤ አይገርምም አንዴ አይደለም ደግሜ ሰማሁት። በዚህ አስተያየት ውስጥ የሃይማኖት ክፍሉን ለሃይማኖቱ ተከታዮች በመተው ወቅታዊ የአገሪቱን ችግር የተመለከተውን ብቻ ለማሳየት እሞክራለሁ። የሰባኪውንም ማንነትም ሆነ የሃይማኖትን ጉዳዮች ሳልነካካ ማለት ነው። የወዳጄም ትልቁ ፍላጎት ይህ ነው።

ሰባኪው ይናገራል። በጥንቱ  መፅሐፍ ቅዱስ እያጣቀሰ የኢትዮጵያን የዛሬ መከራ እና ችግር ይተረትረዋል። ወጣትነት፣ ስደት፣ ሙስና ፣ አድልዎ፣ ተጠያቂነት ምንም አልቀረውም። ሰባኪው የቤተክርስትያኗን አንደበት የሸበበውን በረዶ ሰብሮታል። ልክ ‘ICE Breaker’ እንደሚባለው ማለት ነው። ይህ መጀመሪያው ነው፤ አምናለሁ በርካቶች ሊከተሉ እንደሚችሉ እርግጠኛ ነኝ። አሸባሪ ተብሎ ክስ ካልተመዘዘበት በቀር። ግን ደጋግሞ ‘መናገር ካለብኝ እናገራለሁ፣ አልፈራም ’  ይላል ሰባኪው።

ወያኔ ድሮም በሃይማኖት ጣልቃ የመግባት ምስጢር መንግስተ ሰማያት አሊያም ጀነት የመግባት ፍላጎት አሳስቦት አይደለም። ወያኔ የኢትዮጵያን ህዝብ ያውቀዋል። ኢትዮጵያዊው በሃይማኖቱ ስነምግባርን ብቻ ሳይሆን መስዋዕትነትም የተማረ ህዝብ ነው። ስለዚህ ወያኔ ስልጣኑን ለማስጠበቅ ትላልቅ የሚባሉ ሃይማኖቶችን ወደራሱ መንገድ መጠምዘዝ ነበረበት። ህዝቡ የሃይማኖት አባቶችን ፣ የእምነት ተቋማቱን ያዳምጣል። ከልቡ። ስለዚህ ወያኔ በዚያ በኩል ሊመጣ የሚችለውን ‘የስልጣን አደጋ’ ለመከላከል የዘየደው ዘዴ የሃይማኖት ቁንጮዎችን ማወየን አሊያም መቆጣጠር ነበር።

እንደስብከቱ ግን ሃይማኖትን በአግባቡ ለማምለክ አገርና ማንነት ያስፈልጋል የሚል ግልጽ መልዕክት ተላልፏል። አትዝረፉ። ኽረ ሙስና ይብቃ።ተጠያቂነት ወዴት ነሽ? እያለ ሰባኪው ይጠይቃል። በቃ፣ በቃ፣ ይበቃል። ይላል ሰባኪው።  ወያኔዎች በዚህ መልኩ ከተረዱት ትምህርት ይወስዳሉ። እራሳቸውንም ከጥፋት መልሰው ህዝቡን ማዳመጥ ይጀምራሉ። ይህን መልዕክት የትምክህተኞች እና ያለፈ ስርዓት ናፋቂዎች ነው ብለው የተለመደውን ነጠላ ዜማ ከለቀቁ ግን ከእግራቸው ስር ያለው መሬት እየተሰነጠቀ መሆኑን ለመረዳት እንደረፈደባቸው ያሳያል።

ህዝቡ በሃይማኖት በኩል ማጉረምረም ከጀመረ …. ኦሮማይ።

ሰባኪው በክሊፑ ከ18፡00 እስከ 19፡15 ስደትን እየነገረን ለሚደርሰው ግፍ እና ኢሰብዓዊ ድርጊት ተጠያቂ የለም ይለናል። ከ 28፡33 እስከ 29፡35 ስለ ኢትዮጵያውያኖች ጀግኖች፤ ስላልተዘመረላቸው የኢትዮጵያ እንቁ ጀግኖች ይጠይቃል። ይናገራል። የእኛ ጀግኖች ብዙ እንደሰሩ ግን እንደተደበቁ ያስታውሰናል።

ከ42፡20 ጀምሮ ስለ ኢትዮጵያ ጥቁር ህዝብ ማንነት ይናገራል።የኦርቶዶክስን አከርካሪ መስበር ኢትዮጵያን ለመስበር መሞከር እንደሆነ በማስረጃ ይተነትናል። ቤተክርስቲያኗ ትምህርት ቤት፣ የህክምና ቤት፣ የፍርድ ቤት እንደነበረች ይነግረናል። አከርካሪዋ መሰበር ሳይሆን መመስገን ይገባታል ይለናል።

ከ46፡50 ጀምሮ ስለ ሞራል፣ ስለ አገር ተረካቢነት ይጠይቃል። ሙስና ከቤተመንግስት እስከ ቤተክህነት መንደሯን በስፋት እንደሰራች በግልጽ ይነግረናል። ህዝቡን እርስ በእርስ የማበላላት ፕሮግራም የኢትዮጵያን የወደፊት ማንነት ጥያቄ ውስጥ እንዳስገባ በመጠየቅ፤ መብላት እና መበላላት መወገድ አለበት ይላል። አጽንኦት በመስጠት።

ከ58፡30 ጀምሮ ሰባኪው ይመለስና ወደማንነታችን እንመለስ ይለናል። ወደ እውነት እንምጣ ይለናል።እምቢ፣ እምቢ እንበል ይለናል፤ ኢትዮጵያውያኖች ነንና። ኢትዮጵያውያኖች ነንና ነውር የሆነውን ትተን ወደክብራችን እንመለስ ይለናል።

ከ 1፡00፡50 ጀምሮ ስለነፃነት አባቶች ፣ ከባርነት ላወጡን አርበኞች ክብርና ምስጋናውን ያቀርባል።

 

ኢትዮጵያ ለዘላለም ትኑር!!!

Share Button
Disclaimer: We are not responsible for any losses or damages that may have caused by using our services. EMF declines all responsibility for the contents of the materials stored by users. Each and every user is solely responsible for the posts.
Posted by on December 24, 2013. Filed under Uncategorized. You can follow any responses to this entry through the RSS 2.0. You can leave a response or trackback to this entry

Leave a Reply

Your email address will not be published. Required fields are marked *