ግንቦት ሃያ ሲመጣ… በዳዊት ከበደ ወየሳ (አትላንታ)

ግንቦት 20 በየአመቱ ሲመጣ፤ በብዙዎች ህሊና ውስጥ የተለያዩ ስሜቶች ይመላለሳሉ – ለሚያስደስተው ደስታ፤ ለሚያዝነውም ሃዘን። ሁሉም በየራሱ መንገድ ግንቦት ሃያን ሊያስታውሰው ይችላል። ግንቦት ሃያን በተለየ መንገድ ከሚያስቡት አንዱ የሆነው፤ የኢህአዴግ ፕሮፓጋንዳ ማሽን ኢቲቪ ይህንን ቀን የሚገርም ውሸት እና ቅጥፈት በማስተላለፍ ያሳልፈዋል።  (Read on PDF)

ግንቦት 20 ሲመጣ የኢቲቪ ትግርኛ ፕሮግራም የሚያስተላልፋቸውን ዘፈኖች ልብ በሉ። ከሰላሳ አመት በፊት የተዘፈነው፤ “እምበር ተጋዳላይ” ዛሬም የጭፈራ ማድመቂያቸው ነው። በዚህ ዘፈን የኢትዮጵያ ሰራዊትን የሚሳደቡና የሚያንቋሽሹ ግጥሞች ሲያሰሙን ውለው ያድራሉ። ዋናው ኢቲቪም የነሱን ፈለግ በመከተል፤ የህወሃት ዝፈኖችን ሲያሰማን ይሰነብታል። በትግሉ ውስጥ የተሳተፉት የትግራይ ታጋዮች ብቻ እንደሆኑ ተደርጎ፤ የኢህዴን/ብአዴን ትግል ተፍቆ…  በቴሌቪዥኑ ስክሪን ላይ የህወሃት ታጋዮች አዳፍኔ ይዘው ተራራ ሲወጡና ሲወርዱ ይታያሉ። ይህንን የተመለከተ የአሁን ትውልድ ወጣት በ’ርግጥም ትግሉም ድሉም ህወሃት ያመጣው ገጸ በረከት አድርጎ፤ እነመለስ ዜናዊን ቢያመልክባቸው ሊገርመን አይገባም።

ከምንም በላይ የሚያሳዝንና የሚያሳፍረው ድርጊት ግን ከዚህ የተለየ ነው። በኢቲቪ ውስጥ እርጥባን የሚጣልላቸው የህወሃት እና የኢህአዴግ ግልገል ካድሬዎች፤ ምላስ አንደበታቸውን ሳያነቅፋቸው… የቀድሞ የኢትዮጵያ ሰራዊት አባላትን… የ“ጠላት ጦር” እያሉ ሲጠሯቸው መስማት እጅግ ያሳዝናል። “የአሞራውንም ሆነ የቀሽ ገብሩን ዶክመንተሪ” የተመለከተ ማንኛውም ኢትዮጵያዊ ለዚህ ምስክር ነው። በትረካቸው መሃል “የጠላት ወታደር፣ የጠላት ሰራዊት” እያሉ መጥራትን ተክነውበታል። በሚገርም ሁኔታ የቀድሞው ጠ/ሚንስትር መለስ ዜናዊ ወይም ሳሞራ የኑስ “የጠላት ወታደር” ከማለት ይልቅ… ቢያንስ አፋቸውን አርመው “የደርግ ወታደር” ሲሉ፤ የኢቲቪ ካድሬዎች ግን የጠላት ጦር እያሉ ጆሯችንን ብቻ ሳይሆን ህሊናችንን ያሳምሙታል።

የዚያ ትውልድ ሰዎች ብንሆንም/ባንሆንም፤ በውትድርና መስመር ውስጥ ብንሳተፍም/ባንሳተፍም “ጠላት” የሚለውን ቃል በትግርኛ ቲቪም ይሁን በአማርኛ መስማት ለህሊና የሚቀፍ ነው። ከዚያ በላይ ግን አባባሉ አንድ ሌላ እውነት ያስጨብጠናል። ይህ አባባሉ ህወሃት ኢትዮጵያዊ የሆነና ለኢትዮጵያ ብሎ የቆመን አካል “ጠላት” ብሎ የመፈረጅ ባህል እንዳለው፤ ጥርት አድርጎ ያሳያል። “ህወሃቶች ጨካኝ እና አረመኔ” ብለው የሚጠሯቸ ኮ/ል መንግስቱ ኃይለማርያም እንኳን፤ “ወንበዴዎች” ከማለት ያለፈ ሌላ ቃል በወያኔዎች ላይ ሲሰነዝሩ ሰምተን አናውቅም። ታዲያ እራሳቸውን ንጹህ እና ቅዱስ የሚያደርጉት የኢቲቪ ካድሬዎች፤ “ከመምህሩ ደቀ-መዝሙሩ” እንደሚባለው ከህወሃት በላይ ህወሃት ሆነው፤ በኢትዮጵያዊነት ጎራ የተሰለፈን አካል በጠላትነት ፈርጀው፤ “ጠላት” ብለው ሲጠሯቸው… ትክክል እንዳልሆኑ፤ ቢያንስ ግንቦት ሃያ ሲመጣ ልንነግራቸው ይገባል።

የቀድሞ ፖሊስ ሰራዊት በአየር ወለድ  ያሰለጠናቸው ኢትዮጵያዊያን ምርቃት። 1969 ዓ.ም ከፊት ለፊት የቀድሞ ፖሊስ ሰራዊት አዛዥ ሲሆኑ፤ ከሳቸው ኋላ ኮ/ል ዘላለም መንግስቱ፤ በአሜሪካ ኢንተርፖል ከፍተኛ ስልጠና ወስደው በሮበርት ኤፍ ኬኔዲ የተመረቁ ሲሆን፤ በኢትዮጵያ ሱማሌ ጦርነት ወቅት የጠላትን የሚስጥር ኮድ በመፍታት እና መምህር ሆነው በማሰልጠን ይታወቃሉ። ኢህአዴግ ከገባ ጀምሮ ለ21 አመታት ታስረዋል። ለአገር የሰሩት ውለታ ተረስቶ አሁንም በደሴ እስር ቤት ውስጥ ይገኛሉ። ዋቤ ፎቶ - ሳኦል ዘላለም

የቀድሞ ፖሊስ ሰራዊት በአየር ወለድ ያሰለጠናቸው ኢትዮጵያዊያን ምርቃት። 1969 ዓ.ም
ከፊት ለፊት የቀድሞ ፖሊስ ሰራዊት አዛዥ ሲሆኑ፤ ከሳቸው ኋላ ኮ/ል ዘላለም መንግስቱ፤ በአሜሪካ ኢንተርፖል ከፍተኛ ስልጠና ወስደው በሮበርት ኤፍ ኬኔዲ የተመረቁ ሲሆን፤ በኢትዮጵያ ሱማሌ ጦርነት ወቅት የጠላትን የሚስጥር ኮድ በመፍታት እና መምህር ሆነው በማሰልጠን ይታወቃሉ። ኢህአዴግ ከገባ ጀምሮ ለ21 አመታት ታስረዋል። ለአገር የሰሩት ውለታ ተረስቶ አሁንም በደሴ እስር ቤት ውስጥ ይገኛሉ።
ዋቤ ፎቶ – ሳኦል ዘላለም

በክምር ስንዴ ውስጥ ጥቂት እንክርዳድ እንደማይጠፋው ሁሉ በቀድሞ ሰራዊት ውስጥ፤ ቀዩን መስመር አልፈው ግፍ እና በደልን የፈጸሙ ሰዎች ሊኖሩ ይቻላሉ። ከዚያ በተረፈ ግን የኢትዮጵያ ሰራዊት ማለት… በየብስ ተጉዞ፣ በባህር ተንሳፎ፣ በአየር አንዣብቦ፤ ድንበር አልፈው የመጡ ተስፋፊዎችን፤ አገር ገንጣይና አስገንጣዮችን አከርካሪ ሲሰብር የነበረ፤ ክብር እና ምስጋና ሊሰጠው የሚገባ ጀግኖች የነበሩበት፤ ጀግኖችን ያፈራ የኢትዮጵያ ጋሻ እና መከታ የነበረ ነው። ይህ ሰራዊት የኮ/ል መንግስቱ ኃይለማርያም የግል ወይም የደርግ የወል ሰራዊት አልነበረም። የኢትዮጵያ ህዝብ ልጆች የተሰዉበትና የተሰዉለት መከላከያ ሰራዊት ለመሆኑ፤ ከጥቂት የህወሃቶች በቀር አብላጫው ህዝብ ይስማማበታል። ይህንን በአንደበታችን ብንክደው እንኳን፤ ታሪክ እና ትውልድ የማይፍቀው ሃቅ ነው።

ግንቦት ሃያ በመጣ ቁጥር፤ የቀድሞ ሰራዊትን በመሳደብ እና “ጠላት” በማለት የበአል ማዳመቂያ ማድረግን አንድ ቦታ ማቆም ያስፈልጋል። ዛሬ የምንመጻደቅበት መከላከያ ሰራዊት ልናይ የቻለው ከዚያ ቀድሞ በነበረው ወታደራዊ ስነ-ስርአት ላይ በመገንባቱ ነው። ከወታደራዊ ሳይንስ ስልጠና ጀምሮ የጦር ካምፕ እና መሳሪያዎቻችን በአንድም ሆነ በሌላ መንገድ የቀድሞ ሰራዊት ውርስ እና ቅርሶች ናቸው። አጼ ምኒልክ አድዋ ላይ የተዋጉበት፤ እነባልቻ አባ ነፍሶ የተኮሱት መድፎች እንደቅርስ ተቀምጠው በታሪክ እንደሚጎበኙት ሁሉ፤ የቀድሞ የኢትዮጵያ ጦር ሰራዊት ከምስራቅ እስከ ሰሜን ጫፍ ለመሰለው የአገር አንድነት የተዋጋባቸው ጠመንጃ እና ጀበርና ጭምር ለታሪክ መቀመጥ አለባቸው እንጂ፤ ኢትዮጵያዊ ቅርስን “ጠላት” የሚል ቅጽል ሰጥተን፤ ቅጥፈትን ለትውልድ ማውረስ የለብንም።

አሜሪካኖች በየአመቱ ለአገራቸው ለተሰዉ ወታደሮች ከፍተኛ ክብር ለመስጠት በግንቦት ወር መጨረሻ ላይ Memorial Day በማለት፤ በርስ በርስ ጦርነት ወቅት በሁለቱም ወገን የወደቁትን ወገኖቻቸውን ያስባሉ እንጂ፤ አንዱ ሌላውን እያረከሰ እና እያኮሰሰ ወገኑን “ጠላት” የሚልበትን አጋጣሚ አይተንም ሰምተን አናውቅም። ስለሆነም ግንቦት ሃያ ሲመጣ… ከሰለጠኑት ህዝቦች ቢያንስ አንድ ነገር እንማር።

ስስታምም አንሁን። ትግሉን እና ድሉን የህወሃት ብቻ የምናደርገውን የታሪክ ስስት አንድ ቦታ እናብቃው።  ለኢትዮጵያዊነት የተሰዉትንም ሆነ፤ አሁን የቆሙትን “ጠላት” ብሎ ማለት ይብቃ። ተራራውን በመትረየስ ሲያሸብሩ ኖረው፤ እነሱን በብዕር እና በቃል እያንቀጠቀጡ ሲአያሸብሯቸው፤ ወገንን በ“ጠላት”ነት ፈርጀው “አሸባሪ” ብለው ማሰርን ያቁሙልን። እናም ግንቦት ሃያን በመሰላቸው መንገድ ሲያከብሩት… የህዝብንም ቅርስ እና ሃብት ያክብሩ። በአንድ በኩል የቀድሞውን መቶ አለቃ ግርማ ወልደጊዮርጊስ የአገሪቱን ፕሬዘዳንት አድርጎ፤ በሌላ በኩል ደግሞ የቀድሞውን ጦር ጠላት ብሎ መጥራት ተጻራሪ እና አሳፋሪ ተግባር በመሆኑ፤ ቢያንስ የፕሮፓጋንዳ ምህዋር፤ በአዲስ ዜማ ሊቀየር ይገባዋል – የግንቦት ሃያ መልዕክታችን ነው!!

በዚህ ፎቶግራፍ ላይ የቀድሞ 20ኛው ክፍለጦር የዘመቻ መኮንን፣ የምስራቅ ዕዝ አዛዥ እና ሌሎችም የኢትዮጵያ መኮንኖች ይታያሉ።  በ1976 ዓ.ም. ኢትዮጵያን በድጋሚ ለመውረር የተንቀሳቀሰውን የሱማሌ ጦር ለመምታት የጦር መኮንኖቹ ያለወታደር የደገሃቡርን አካባቢ በማጥናት የውጊያ  ዝግጅት ሲያደርጉ  ይታያል። በወቅቱ የውጭ አገር ወታደራዊ አማካሪዎች፤ የኢትዮጵያ ሰራዊት ልብስ ለብሰው አብረዋቸው  ይታያሉ። ከዚህ የውጊያ ዝግጅት በኋላ በዚያድ ባሬ የሚመራው የሱማሌ ጦር፤ ዋርዴር ላይ ለመጨረሻ ጊዜ አከርካሪው ተሰብሮ፤ ዳግመኛ ኢትዮጵያን ለመውረር የሚያደርገውን ተስፋፊነት አስቁመውታል። ጥያቄያችንም አንድ ነው...  “እነዚህ ለኢትዮጵያ አገራቸው ክብር የሰሩ እና የተሰዉ የሰራዊት አባላትን “ጠላት” ብሎ መጥራት አግባብ ነው?” ፎቶውን ከግል ማህደሩ አውጥቶ ለEMF የሰጠን በNorth Carolina ነዋሪ የሆነው - ሻለቃ ደምሴ አሞሴ ነው። ሌሎቹስ የት ይሆኑ?

በዚህ ፎቶግራፍ ላይ የቀድሞ 20ኛው ክፍለጦር የዘመቻ መኮንን፣ የምስራቅ ዕዝ መምሪያ መኮንኖች እና ሌሎችም የኢትዮጵያ መኮንኖች ይታያሉ። በ1976 ዓ.ም. ኢትዮጵያን በድጋሚ ለመውረር የተንቀሳቀሰውን የሱማሌ ጦር ለመምታት የጦር መኮንኖቹ ያለወታደር የደገሃቡርን አካባቢ በማጥናት የውጊያ ዝግጅት ሲያደርጉ ይታያል። በወቅቱ የውጭ አገር ወታደራዊ አማካሪዎች፤ የኢትዮጵያ ሰራዊት ልብስ ለብሰው አብረዋቸው ይታያሉ። ከዚህ የውጊያ ዝግጅት በኋላ በዚያድ ባሬ የሚመራው የሱማሌ ጦር፤ ዋርዴር ላይ ለመጨረሻ ጊዜ አከርካሪው ተሰብሮ፤ ዳግመኛ ኢትዮጵያን ለመውረር የሚያደርገውን ተስፋፊነት አስቁመውታል። ጥያቄያችንም አንድ ነው… “እነዚህ ለኢትዮጵያ አገራቸው ክብር የሰሩ እና የተሰዉ የሰራዊት አባላትን “ጠላት” ብሎ መጥራት አግባብ ነው?”
(ፎቶውን ከግል ማህደሩ አውጥቶ ለEMF የሰጠን በNorth Carolina ነዋሪ የሆነው – ሻለቃ ደምሴ አሞሴ ነው። ሌሎቹስ የት ይሆኑ?)

Share Button
Disclaimer: We are not responsible for any losses or damages that may have caused by using our services. EMF declines all responsibility for the contents of the materials stored by users. Each and every user is solely responsible for the posts.
Posted by on May 27, 2013. Filed under Uncategorized. You can follow any responses to this entry through the RSS 2.0. You can leave a response or trackback to this entry

One Response to ግንቦት ሃያ ሲመጣ… በዳዊት ከበደ ወየሳ (አትላንታ)

  1. Brian Reply

    May 28, 2013 at 11:04 PM

    Dawit, I totally agree, but we know that they do not care about Ethiopian history let alone Ethiopian Military. They know what they are talking about and know what they are doing. Awko Yetgna Bikesekesut Aysemam” endilu new.

Leave a Reply

Your email address will not be published. Required fields are marked *