የኢቲቪ ጋዜጠኞች ቤትና ንብረት በእሳት ቃጠሎ ወደመ

በየማነ ናግሽ (Reporter)

በአዲስ አበባ ቂርቆስ ክፍለ ከተማ ወረዳ 09 በተለምዶ ፍላሚንጎ እየተባለ በሚጠራው አካባቢ የሚኖሩ ሦስት የኢትዮጵያ ሬዲዮና ቴሌቪዥን ድርጅት ጋዜጠኞች መኖርያ ቤትና ንብረት በእሳት ቃጠሎ ወደመ፡፡ ከትናንት በስቲያ ጠዋት ሁለት ሰዓት ገደማ የተነሳው ይኼው የእሳት ቃጠሎ መንስዔ ያልታወቀ ሲሆን፣ የሁለት ጋዜጠኞችን ቤትና ንብረት ሙሉ ለሙሉ ሲያወድም የሦስተኛው ጋዜጠኛ ንብረት በከፊል ሊድን ችሏል፡፡ በአጠቃላይ በመቶ ሺዎች ብር የሚገመት ንብረት ወድሟል፡፡

ጋዜጠኞቹ ደባስ ባይለየኝ፣ በቀለ ተመስገንና ኢትዮጵያ በዲቻ ሲባሉ፣ እሳቱ የተነሳው ብቻውን ከሚኖረው ከኢትዮጵያ በዲቻ ክፍል ነው ተብሏል፡፡ እሳቱ ሦስቱ ጋዜጠኞች የሚኖሩበትን የመንግሥት ቤት ሙሉ ለሙሉ ሲያወድም፣ አጠገቡ ወደሚገኘው አቢሲንያ ሆቴልና ሌሎች ቤቶች እንዳይዛመት በአካባቢ በነበሩ ፖሊሶችና ነዋሪዎች ርብርብ መከላከል መቻሉ ታውቋል፡፡

ቁጥራቸው እስከ ስድስት መቶ የሚገመት ነዋሪዎች ተረባርበው ቃጠሎውን ሲያጠፉ፣ በአካባቢው የሚገኙ ፖሊሶችም ከነዋሪዎች ጋር በመሆን እሳቱን ለማጥፋት ሲንቀሳቀሱ ተመልክተናል፡፡ ነዋሪዎቹንም ምሥጋናቸውን ችረዋቸዋል፡፡

ከመንግሥት ኮሙዩኒኬሽን ጉዳዮች ጽሕፈት ቤት ፖሊሶች ቀድመው ሲደርሱ፣ በአካባቢው የሚገኙ የአዲስ አበባ ከተማና የፌዴራል ፖሊሶችም ተቀላቅለው እሳቱን ለመከላከል ችለዋል፡፡ በቦታው አግኝተን ያነጋገርናቸው ምክትል ሳጅን አንቺአየሁ ብርሃኑና ሳጅን ሱንዱቅ አብዱልቃድር ይህንኑ አረጋግጠውልናል፡፡

ነዋሪዎቹ የእሳት ቃጠሎውን በማጥፋት ላይ ሳሉ ዘግይቶ የደረሱት የእሳትና ድንገተኛ አደጋዎች መከላከል ኤጀንሲ ሠራተኞች በነዋሪዎቹ ከፍተኛ ወቀሳ ደርሶባቸዋል፡፡ ስልክ ከተደወለ አንድ ሰዓት ያህል ዘግይተው መድረሳቸው በነዋሪዎች ተነግሯቸዋል፡፡ ፖሊሶችም ይህንኑ አረጋግጠዋል፡፡ ዘግይተው ደረሱ የተባሉት የእሳት አደጋ መከላከል ሠራተኞች በመጥፋት ላይ የነበረውን እሳት ጨርሰው ማጥፋት የቻሉ ሲሆን፣ ይህን ያህል ጊዜ ለምን እንደዘገዩ ላቀረብንላቸው ጥያቄ የመንገድ መዘጋጋትን በምክንያትነት አቅርበዋል፡፡ ፖሊሶቹ ግን ከዚህ በፊትም በአካባቢው ተመሳሳይ አደጋ ደርሶም ዘግይተው መድረሳቸውን ተናግረዋል፡፡

በየአካባቢው የእሳት አደጋ መከላከል ጣቢያ እንዲኖር ሲያስቡ የነበሩ አንዳንድ ነዋሪዎች፣ ‹‹የሠፈሩ ሰው ባይኖር’ኮ አልቀናል ነው የሚባለው›› ሲሉ ቅሬታቸውን ለድርጅቱ ሠራተኞች አቅርበዋል፡፡

Share Button
Disclaimer: We are not responsible for any losses or damages that may have caused by using our services. EMF declines all responsibility for the contents of the materials stored by users. Each and every user is solely responsible for the posts.
Posted by on November 20, 2012. Filed under Uncategorized. You can follow any responses to this entry through the RSS 2.0. You can leave a response or trackback to this entry

Leave a Reply

Your email address will not be published. Required fields are marked *