ወ/ት ብርቱካንን በቴሌቭዥን ማሳየት ጤንነቷን አያመለክትም!

EMF– Free Birtkan and All Prisoners of Conscience Task Force released press release regarding ETV’s recent political game about Birtukan’s health. Click here to read the amharic statement.
የኢትዮጵያ ቴሌቭዥን ባልደረቦች፣ የፋሲካ በዓልን ምክንያት በማድረግ በቃሊቲ ማረሚያ ቤት ያደረጉት ቆይታን በኢንተርኔት ተመልክተናል። በዚህ ቅንብር ሕግ ወጥና ኢፍትሃዊ በሆነ መንገድ፣ ከአራት መቶ ሰባ ቀናት በላይ የታስረችዉን ወ/ት ብርቱካን ሚደቅሳን ለማየት በመቻላችንና ድምጿን በመስማታችን መደሰታችንን ለመግለጽ እንወዳለን።
ወ/ት ብርትካን ሚደቅሳ ከስድስት ወራት በላይ በጨለማ ቤት ዉስጥ እንድትቀመጥ ተደርጎ የስነ ልቦና ቶርቸር እንደተፈጸመባት፣ የአገሪቷ ሕገ መንግስት፣ እስረኞች በቤተሰብ በዘመድ በወዳጅ በሃኪም በጠበቃ በመንፈሳዊ አባትና በማንኛዉም ዜጋ የመጎብኘት ሙሉ መብት እንዳላቸዉ ቢደነግግም፣ የቃሊቲ ማረሚያ ቤት ሃላፊዎች ግን፣ የአገሪቷን ሕግ በመናድ፣ ወ/ት ብርቱካን ሚደቅሳ ከእናቷና ከሕጻን ልጇ በስተቀር እንዳትጎበኝ አግደው መቆየታቸዉ በገሃድ የሚታወቅ ነዉ።

ወ/ት ብርቱካን ሚደቅሳ ከስምንት ወራት በላይ ስትታመም መቆየቷን፣ በማረሚያ ቤት የሚሰጠዉ ህክምና ምንም ለዉጥ እንዳላመጣና በገለልተኛ የሕክምና ባለሞያዎች መታየት እንደምትፈልግ ጥያቄ ብታቅርብም፣ የማረሚያ ቤት ሃላፊዎች ግን እስከ አሁን ድረስ ሕክምና እንድታገኝ አለመፍቀዳቸዉንም ለማረጋገጥ ችለናል። ይህም ብዙዎቻችንን አጥብቆ እያሳዘነና እያስቆጣ ያለ አንገብጋቢና ትልቅ ጉዳይ ነዉ።

ለእስረኞች መብት ቆሚያለሁ የሚለዉና በፓስተር ዳንዔል የሚመራዉ የሰብዓዊ ድርጅት፣ ላለፉት በርካታ ወራት በወ/ት ብርቱካን ሚደቅሳ ላይ ገዢዉ ፓርቲ ጭካኔ የተሞላበት ግፍ ሲፈጸም፣ የት እንደነበረ ለማወቅ ባንችልም፣ የድርጅቱ መሪ ፓስተር ዳንዔል ወደ ቃሊቲ እሥር ቤት መሄዳቸዉንና ወ/ት ብርቱካን ሚደቅሳንም ማነጋገራቸዉን በአዎንታዊነት ነዉ የምንመልከተዉ።

ይህ ለእስረኞች ቆሚያለሁ የሚለዉ ድርጅት ትልቅ ትኩረት ሰጥቶት በወ/ት ብርቱካን ሚደቅሳ ላይ እየደረሰ ያለዉን ጭካኔ እንዲቆም፣ አስቸኳይ ሕክምና ወይዘሪቷ እንድታገኝ፣ በወዳጅ ዘመድ እንድትጎብኝ ብሎም እንድትፈታ ግፊት እንዲያደርግ እንጠይቃለን። በኢትዮጵያ ቴሌቭዥን ወጥቶ ገዢዉ ፓርቲ ለፍትህ የቆመ እንደሆነ በዉሸት እስከመናገር ድረስ ድፍረት ከተገኘ፣ ለእስረኞች መብትና ለእዉነት በጋሃድና በይፋ ለመቆም የሚያስፈራ ምንም ምክንያት ሊኖር አይችልም ብለን እናምናለን።

የቃሊት ማረሚያ ቤትን በተመለከተ ኢቲቪ ባቀረበዉ ዘገባ የኢትዮጵያ ፌዴራል መንግስት የማረሚያ ቤቶች ምክትል ሃላፊ የሆኑ ባለሥልጣን፣ ማረሚያ ቤቶች የፍርድ ቤት ዉሳኔን እንደሚያስፈጽሙና የእስረኞቹን መብት እንደሚያስከብሩ ለማስረዳት የሞከሩበት ሁኔታን ታዝበናል። ይህ ከእዉነት የራቀ፣ ለተራ የፕሮፖጋንዳ ፍጆታ እንዲዉል የታሰበ አሳዛኝና አሳፋሪ አባባል እንደሆነ እየገለጽን፣ ማንም ማንበብና መጻፍ የሚችል ኢትዮጵያዊ ቦታ የሚሰጠዉ እንዳልሆነ እናረጋግጣለን።

የማረሚያ ቤት ሃላፊዎች የአገሪቷን ሕግ በመናድ፣ ወ/ት ብርቱካን ሚደቅሳ እንዳትጎበኝ በመከልከላቸዉ ጉዳዩ ወደ ፍርድ ቤት እንደተመራ፣ ፍርድ ቤትም ማረሚያ ቤቱ ወ/ት ብርትካን ሚደቅሳን ለመጎብኘት የሚመጡትን ማገድ እንደሌለበት ትእዛዝ እንደሰጠና ይህን የፍርድ ቤት ትእዛዝ በመናቅ የማረሚያ ቤት ሃላፊዎች በወ/ት ብርትካን ላይ የሚያደርሱትን ግፍ ሁላችንም የምናወቀዉ ነዉ።

ሕግ ማክበር በወሬ ሳይሆን በተግባር ይታይ እንላለን። ገዢዉ ፓርቲ ፓስተር ዳንኤል፣ ወ/ት ብርቱካን ሚደቅሳን እንዲጎበኙ ፍቃድ እንደሰጠ ሁሉ፣ የአገሪቱ ሕገ መንግስት እንደሚደነግገዉ፣ ወ/ት ብርቱካን ሚደቅሳ በሌሎች መንፈሳዊ አባቶች፣ ጠበቆች፣ ሃኪሞች፣ የሥራ ባልደረቦች፣ ወዳጆችና ጓደኞች ያለ አንዳች ተጽኖ እንዲጎበኙ መፍቀድ አለበት እንላለን።

ወ/ት ብርቱካን ሚደቅሳ ከስድስት ወራት በላይ ጨለማ ቤት በመቀመጧ የተነሳ ለቀናት እንቅልፍ እስክታጣ ድረስ፣ በዉጫዊ አካሏ የማይታይ ከፍተኛ የአይምሮ ሕመም ላይ በመሆኗ፣ በአስችኳይ ከማረሚያ ቤቱ ዉጭ ባሉ ገለልተኛ የሕክምና ባለሞያዎች እንድትታይ እንጠይቃለን።

ወ/ት ብርትካን ሚደቅሳ የሕግ እስረኛ አይደለችም። ወ/ት ብርትካን ሚደቅሳ በፖለቲካ እምነቷ ምክንያት የታስረች የሕሊና እሥረኛ ናት። በመሆኑ በአስቸኳይ መፈታት አለባት ብለን እናምናለን። ለዚህም የኢትዮያ ሕዝብ ሁሉ ያለ መታከት ለዚች ታላቅ ሴት መፈታት አጥብቆ እንዲሰራና እንዲታገል ጥሪ እናቀርባለን።

በዚህ አጋጣሚ በወ/ት ብርቱካን ሚደቅሳ ላይ እየደረሰ ላለው ማንኛዉም አይነት ጉዳት የማረሚያ ቤት ሃላፊዎችንና አለቆቻቸዉን ሙሉ ለሙሉ የኢትዮያ ሕዝብ ተጠያቂ እንደሚያደርጋቸዉ ለማስታወስ እንወዳለን።

Click here to read the statement.

Share Button
Disclaimer: We are not responsible for any losses or damages that may have caused by using our services. EMF declines all responsibility for the contents of the materials stored by users. Each and every user is solely responsible for the posts.
Posted by on April 11, 2010. Filed under NEWS. You can follow any responses to this entry through the RSS 2.0. Responses are currently closed, but you can trackback from your own site.