“አለባብሰው ቢያርሱ ……….” ከወሰን ሰገድ ገ/ኪዳን (ጋዜጠኛ)

አሀዱ

ዕለተ ሰኞ ሰኔ 11 ቀን 2004 ዓም አመሻሹ ላይ ሞባይሌ ተንጫረረች፡፡ አንስቼ ወደ ጆሮዬ አስጠጋኋት፡፡ ጓደኛዬ ጋዜጠኛና ገጣሚ ሰለሞን ሞገስ ነው፡፡

“ሳይቸግርህ ሰዎቹን ነካክተህ….” ያለ መሰለኝ፡፡ “ምን አልከኝ?” አልኩት የተናገረውን ለማረጋገጥ፡፡ “የቀድሞው አለቃህ ፋሲል የኔዓለም በቃሊቲ ምስጢሮች የተነሳ የፃፈውን ኢንተርኔት ላይ ተመልከት” አለኝ፡፡

በማግስቱ ማክሰኞ ሰኔ 12 ቀን 2004 ዓም ከጠዋቱ 4 ሰአት አካባቢ ሌላው ጓደኛዬ አለማየሁ ባዘዘው “ፋሲል ወንዱ ልክ ልኬን” እንደነገረኝ ደግሞ አበሰረኝ፡፡ ወዲያው ወደኢንተርኔት ቤት ጎራ አልኩ፡፡ እናም የፌስ ቡክ ገፄን ከፈትኩት፡፡ ሁለት መልዕክቶች አሉኝ፡፡ በየተራ ከፈትኳቸው፡፡ አንደኛው ቅዱስ ያሬድ ኤፍሬም የተባለ ሰው የላከልኝ ነው፡፡ ሰባት ጊዜ ወድቆ የተነሳውን “ቅዱስ ያሬድ”ን እያሰብኩ መጠቆሚያ ቀስቱን ወደፖስታው መራሁት፡፡

የፋሲል የኔዓለም ፅሁፍ ከፊቴ ተዘረጋ፡፡ አነበብኩት፡፡ ሁለት ዓይነት ሥሜት ተሰማኝ፡፡ አንድም ደስ አለኝ፡፡ መፅሐፌ በዓለም ዙሪያ እየተነበበ ነውና፡፡ አንድም አዘንኩ፡፡ ፋሲል የኔዓለም በእያንዳንዱ የፅሁፉ መስመር ውስጥ ሲንጨረጨር ታየኝ፡፡ ከልብ አዘንኩለት!!

ክልዔቱ

እያዘንኩ ሁለተኛውን መልዕክቴን ለማየት የመጠቆሚያ ቀስቱን ወደ ፌስ-ቡኬ ፖስታ ሰደድኩት፡፡ የፖስታው መሸፈኛ ተነሳልኝ፡፡ የጋዜጠኛ ተስፋዬ ገ/አብ ፅሁፍ በኮምፒውተሩ ስክሪን ላይ ፈሰሰ፡፡

ተስፋዬ በ”የቃሊቲ ምስጢሮች” መፅሐፍ ውስጥ ካነበባቸው ታሪኮች መሀል በዝዋይ ማረሚያ ቤት 14 ዓመት ሙሉ የታሰረውና የመፈቻውን ቀን የሚናፍቀውን ሁሴን (የኦነግ ወታደር የነበረ) ታሪክ ነቅሶ አውጥቷል፡፡ እናም እጥር ምጥን ባለው ፅሁፉ እንዲህ ብሎ አሳርጓል፡-

“…እነሆ እኔም ተክዤአለሁ፡፡ ሁሴን በኦነግነት ተይዞ የታሰረው ሌንጮ ለታ እና ዲማ ነገዎ አመራር በነበሩበት ወቅት ነው፡፡ ልክ እንደሁሴን በአስር ሺህዎች በወያኔ ማጎሪያ ተወርውረዋል፡፡ የት እንደደረሱ የማይታወቅ የተረሱ እስረኞች ቁጥር ዳርቻ የለውም፡፡ ይህንን እያሰብኩ የወሰንሰገድን መፅሐፍ አጥፌ ተከዝኩ፡፡….”

እኔም ልክ እንደተስፋዬ ተክዤ የፌስቡክ ገፄን ከረቸምኩት፡፡ ሆኖም የተከዝኩትና ያዘንኩት ለእኔ አልነበረም፡፡ ለቀድሞው “አለቃዬ” የእስር ቤት ጓደኛዬ የአሁኑ የኢሳት ፊታውራሪ ለሆነው ፋሲል የኔዓለም ነው፡፡

ሠለስቱ

አንጋፋው ድምፃዊ ተሾመ ምትኩ “አስራት” በሚል ርዕስ ባሳተመው ካሴት ሁሌም ሳደምጠው የሚመስጠኝ አንድ ዘፈን አለ፡፡ “እሹሩሩ ማሞ” የሚል፡፡

“…..እሹሩሩ ማሞ እሹሩ ማሙዬ

ዘመን አሳለፍኩኝ አንተን ተሸክሜ አንተን አንጠልጥዬ…” ይላል ድምፃዊው፡፡ ልጁን እያባበለ ወይም እያጫወተ አይመስለኝም፡፡ በማያድግና ከትከሻ የማይወርድ ልጅ በመሆኑ እየተማረረ እንጂ፡፡ እኔም እንዲሁ እሹሩሩ ማለት የምችል አይመስለኝም፡፡ እነፋሲል የኔዓለም ግን አሁንም እሹሩሩን ይሻሉ መሰለኝ ማለቃቀስ ጀምረዋል፡፡

እንደመሰለኝ ለፋሲል ማለቃቀስ ምክንያት የሆነው የኔው መፅሐፍ ነው፡፡ አንድ አንባቢ መፅሐፌን አንብበው ግምገማዊ ፅሁፋቸውን ኢትዮ-ሚዲያ እና ኢኤም ኤፍ በተባሉ ድረገፆች አውጥተዋል፡፡ ሆኖም ገምጋሚው ስማቸውን አልገለፁም፡፡ ፋሲል የኔዓለም “ጎንትለውኛል” ባይ ነው፡፡ በእሱ አባባል “ስብዕናውን ለማጨቅየት” ነው በግምገማ ሰበብ ብዕራቸውን ያነሱት፡፡ ፋሲል ለእኚህ “ሥም የለሽና ሥም አጥፊ” ገምጋሚ ምላሽ ባይሰጥ ደስ እንደሚለው፣ ግን ደግሞ እንዳልስቻለው በመጀመሪያው አንቀፅ ያትታል፡፡

“…በህይወቴ ሙሉ ደስ ሳይለኝ ከፃፍኳቸው ፅሁፎች መሃል አንዱ ይህ ነው፡፡..” ብሎ ይቀጥላል፡፡ እናም ሶስት ገፅ ሙሉ የመልስ ምት ያለውን ፅሁፍ ያስነብበናል፡፡

የእስር ቤት ጓደኛዬና የቀድሞ “አለቃዬ” ችግርም ከዚሁ ከመንደርደሪያው አንቀፅ ይጀምራል፡፡ ደስ ሳይለው የሚፅፍ ሰው፣ ደሰታውን የሚነጠቀው በራሱ ዕጅ ነውና፡፡ ስለዚህም አዘንኩለት፡፡ ደስ ያለውን ትቶ ደስ ያለውን በማድረጉ፡፡ ምነው ቢሉ? መነሻውን ያላወቀ መድረሻውን እንደማያውቅ ሳይታለም የተፈታ ሐቅ ነውና፡፡ የፋሲልም የመልስ ፅሁፍ እንደዚያው ነው፡፡ ዒላማውን የሳተ፡፡ “ለስም የለሹ” መፅሐፍ ገምጋሚ መልስ ብሎ ከቸከቸው 3 ገፅ ፅሁፍ ገሚሱ ያነጣጠረው በእኔ “የቃሊቲ ምስጢሮች” ደራሲ ላይ ነውና፡፡ ስለዚህ የፋሲል መልስ ምት ገና ከመነሻው ነው የከሸፈው፡፡ ዓላማ ሲከሽፍ ደግሞ ያሳዝናል፡፡ ቢሆንም……

አርባዕቱ

የሆኖ ሆና ፋሰል የኔዓለም ለስም አልባው ገምጋሚ በሰጠው ምላሽ ለማለት የፈለገው “በማተቤ ልዳኝ!”” ነው፡፡ በማተቤ ዳኙኝ እንጂ ካለሥም ስም አትስጡኝ ነው፡፡ እንዲያ ከሆነ ዘንዳ ጥያቄው አንድና አንድ ነው የሚሆነው፡፡ ማነው ባለማተብ!? ማነው ማተቡን የበጠሰ!? ማነው የተበጠሰ ማተኑን ለመቀጠል ባህር ማዶ የተሻገረ!? ማነው ከነማተቡ ያለ!? መልሱ ከባድ አይደለም፡፡ ቀላልም አይደለም፡፡ ሁሉም የማተቡን ልክ የሚመጥነው በአንገቱ ልክ ነውና፡፡ ቢሆንም ያገሬ ሰው “አንገት የተፈጠረው አዙሮ ለማየት ነው” የሚለው እንዲሁ ለይምሰል አይደለም፡፡ አንገት ለማተብም አዙሮ ለማየትም ይጠቅማልና ነው፡፡ እናም ምስቲ የ”አፄ ፋሲል”ን መልስ ተብዬ ፅሁፍ ዞር ዞር ብለን እንፈትሸው፡፡ በየተራ፡-

“….የቃሊቲ ባልደረባዬ የነበረው ወሰንሰገድ ገ/ኪዳን መፅሐፍ በማሳተሙ እጅጉን ተደሰቻለሁ፡፡ ወሰን ብዙ ተሰቃይቷል፡፡ አብዛኛውን ጊዜ እሱ ባልፃፋቸው ፅሁፎች /በዋና አዘጋጅነት ስሙ ስለተቀመጠ/ ፍርድ ቤት ተመላልሷል፡፡… ” ይላል ፋሲል ስለእኔ፡፡

ይገርማል! ፋሲል ለማለት የፈለገው ጋዜጠኛ አይደለም፤ አይፅፍም፤ ሌሎች በፃፉት ነው ሲከሰስ የኖረው ነው፡፡ እንደእውነቱ ከሆነ አንድ ጋዜጣ ከዳር እስከዳር ብቻ (በዋናአዘጋጁ) እንደማይለቀለቅ አገር ያወቀው ፀሐይ የሞቀው ሐቅ ነው፡፡ በጋዜጣው ለወጡ ፅሁሮች ደግሞ ሙሉ ኃላፊነቱን የሚወስደው ዋና አዘጋጁ ነው፡፡ እኔ ለበርካታ ዓመታት ይህንን ኃላፊነት በፅናትና በቁርጠኝነት ተወጥቻለሁ፡፡ ኃላፊነት ከበደኝ ብዬ አላፈገፈግኩም፡፡ አልሸሸሁም፡፡ የፈረንጅን እርጥባን ለመቃረም ባህር ማዶ አልተሻገርኩም፡፡ ግንባሬን አላጠፍኩም፡፡ ለፋሲል የኔዓለም ምስጢር የሆነበት ታዲያ ምኑ ነው!? ቀድሞ ነገር ፋሲል ይህንን ለማለት ምን የሞራል ብቃት አለው!?  መቼ ወደነፃው ፕሬስ መጥቶ፣ መቼ ጋዜጠኛ ሆኖ ነው!?  “”መቼ መጣሽ ሙሽራ፣ መቼ ቀነጠስሽ ሽምብራ” የሚባለው እንዲህ ያለ ነገር ሲገጥም መሰለኝ፡፡ ደርሶ ጀግና መምሰል፣ እኔ ብቻ አዋቂ ነኝ ማለት ትርፉ ዘበት ነው፡፡ ጎበዝ ሰው ይታዘባል!!

አምስቱ

…”…ወሰንን በሥራ ዓለም ብዙ አላውቀውም፡፡ አዲስ ዜና ከሁለት ወር በላይ የሰራ አይመስለኝም፡፡ …ከአራት ቀናት የበለጠ ቢሮ ውስጥ ተገናኝተን የምናውቅ አይመስለኝም፡፡…ብዙ ጋዜጠኞቻችንን የሚያዘናጋብን የ‹ጀበና› ቤት ደንበኛ መሆኑም ብዙ እንዳላውቀው አድርጎኛል፡፡…” ይላይ ፋሲል፡፡

አባባሉ ከሞላ ጎደል እውነት አለው፡፡ “ጭቦ” ይጎላበታል እንጂ፡፡ እርግጥ ነው አዲስ ዜናን ስንሰራ ብዙ አንተዋዋቅም፡፡ ልንተዋወቅም የምንችልበት ሁኔታ አልነበረም፡፡ እሱ ከዶ/ር ብርሃኑ አፍ የሚንጠባጠብ የሥልጣን ፍርፋሪ ለመለቃቀም ውሎና አመሻሹን ሲባዝን እኔ ቢሮ ነኝ፡፡  እሱ ከፖለቲከኞቹ በላይ ፖለቲከኛ መስሎ ለመታየት ሲንደፋደፍ እኔ ከሕዝብ ጋር ነኝ፡፡ ሕዝብ ውስጥ የሕዝቡን የልብ ትርታ እያዳመጥኩ፡፡

አንድ አብነት ብቻ ልጥቀስ፡- ፋሲል የኔዓለም የዶ/ር ብርሃኑ ነጋ ነጠላ አቀባይ ነኝ እያለ ሲያሸረግድ (በወርሃ ነሐሴ 97 ዓም ሁለቱን ሳምንታት)  እኔ ባህርዳር እና ጎንደር ከተማ ውስጥ ዘገባ ላይ ነበርኩ፡፡ ጋዜጠኝነት ሕዝብ ውስጥ እንጂ ፖለቲከኞች ቢሮ ውስጥ ብቻ የሚገኝ አይደለም፡፡ ያለመተዋወቃችን ምክንያት ይኸው ነው፡፡ እኔ የሕዝብ እሱ የሹመኞች ወገን መሆናችን፡፡

ይልቅስ የገረመኝ “ወሰን የ‹ጀበና› ቤት ደንበኛ መሆኑ አልተዋወቅንም” ያለው ነው፡፡ ጫት ቤት ማለቱ ነው፡፡ ጫት ይቅማል ለማለት ነው፡፡ እንዲህ ፍርጥ ፍርጥርጥ አድርጎ መናገር እያለ እንደ”ሥራቤት” የምን ነገር ማዟዟር ነው!? ቢሆንስ ችግሩ ምንድነው? አንድ ሰው ቢጠጣ፣ ቢያጨስ፣ ጮማ ቢቆርጥ ጋዜጠኝነቱን ምን ይከለክልዋል? “ጋዜጠኞቻችንን ያዘናጋብን” የሚለውስ የተዘናጉት ጋዜጠኞች™‹ የትኞቹ ናቸው!? የነቃሁና የበቃሁ ጋዜጠኛ እኔ ብቻ ነበርኩ ለማለት ነው!? በማን መስዋዕትነት ማነው ጉራ የሚነፋው? ኧረ ጎበዝ! ሌላው ቢቀር ህሊና የሚባል ነገር አለ፡፡ ወይስ ባህር ማዶ ሄደው ሲመሽጉ ህሊና የሚባል ነገር ይጠፋል ማለት ነው!? አድነነ ከመአቱ ማለት ይኼኔ ነው፡፡

አምስቱ

“….እስር ቤት ወሰንን ማወቅ ችያለሁ፤ ጥቃትን የማይወድ ደፋር  በመሆኑ እወደዋለሁ፡፡ አዛኝና ለማንም የማይጨነቅ ነው፡፡ /የሥነፅሁፍ ችሎታውን ሳንጠቀምበት ቀርተናል/ ….” ይላል ፋሲል፡፡

እንደእውነቱ ከሆነ እነዚህ ውዳሴዎች አስፈላጊ አልነበሩም፡፡ ስለችሎታዬ የፋሲል መወድስ የሚያሻኝም አይደለሁም፡፡ “ችሎታውን ሳንጠቀምበት” ያለው ግን በመጠኑ አስፈግጎኛል፡፡ የእኔ ችሎታ ለእነፋሲል አይነቱ መጠቀሚያ ሊውል አይችልም፡፡ ችሎታዬን የማውለው ለሕዝብ ጥቅም ብቻ ነው፡፡ “መጣፍ” ሳይሆን መፃፍ እንደምችል ጠንቅቄ አውቃለሁ፡፡ እንደፋሲል አልጥፍም፤ ነገር አልደርትም፡፡ የፋሲል ውዳሴ የማያስፈልገኝ ለዚህ ነው፡፡ የፋሲል ከንቱ ውዳሴ አሰስ ገሰሱን አስከትሎ እንደሚመጣም አውቃለሁ፡፡ እንደሚከተለው ያለ ዝባዝንኬ፡-

“….የኢህአዴግ ባለሥልጣናት ከቅንጅት መሪዎች የተሻለ ሥነምግባር እንደተላበሱ አድርጎ ያቀረበበት ክፍል ‹ወሰን የትግል ታሪኩን ለጀበና ለውጦት ይሆን የሚል ጥያቄ አሳድሮብኛል፡፡ ሰዎች ለመኖር ሲሉ እምነታቸውን ይሸጣሉ፤ ወሰን ግን እንዲህ በቀላሉ ህሊናውን እንደማይሸጥ እመሰክራለሁ፡፡….ወሰን ባላወቀው ወይም ሆን ብሎ የአሳዳጆቹ መጠቀሚያ ሊሆን እንደሚችል እገምታለሁ፡፡… ” ይላል ፋሲል፡፡

የምን መዘላበድ ነው እሱ!? አንድ ሰው ማለት የፈለገውን በግልፅና ፊትለፊት ተናግሮ ቢወጣለት ነው የሚሻለው፡፡ እዚህና እዚያ እየረገጡ መውሸልሸል ህሊና አለኝ ብሎ ከሚያምን ሰው የሚጠበቅ ተግባር አይደለም፡፡ እንዲያ ከሆነ ደግሞ ፋሲል ስለህሊና ነፃነት የመናገር ብቃት የለውም ማለት ነው፡፡ ህሊና ጫካ አይደለም፡፡ በራስ ላይ መሸፈት አያስችልም፡፡ አይሸፍጥምም፡፡ ህሊና ለእውነት ከእውነት ጋር ነው የሚኖረው፡፡ እኔም “በቃሊቲ ምስጢሮች” መፅሐፍ ውስጥ የከተብኩት ያየሁትን፣ ያስተዋልኩትን፣ የማውቀውን ሐቅ ብቻ ነው፡፡ አንዲትም ቃል ሃሰት የለበትም፡፡

ፋሲል ከየት እንዳመጣው አላውቅም እንጂ የኢህአዴግ ባለሥልጣናት ከቅንጅት መሪዎች የተሻለ ሥነምግባር እንደተላበሱ አድርጌ አልፃፍኩም፡፡ ምክንያቱም የኢህአዴግ ባለሥልጣናት ከእኔ ጋር አልታሰሩም፡፡ ከእኔ ጋር ስለታሰሩት የቅንጅት መሪዎችና ጋዜጠኞችን ውሎና አዳር እንዲሁም አመለካከት ብቻ ነው የፃፍኩት፡፡ ሕዝብ ያላየውን ነገር ግን ማየት የሚገባውን እውነት ነው የገላለፅኩት፡፡ የፋሲል መንጨርጨር ገበናዬ ለምን ተገለጠ የመነጨ ካልሆነ በቀር፡፡

በነገራችን ላይ ማንበብና ማነብነብ ሁለት የተለያዩ ነገሮች መሆናቸውን ለፋሲል መናገር ያለብኝ አይመስለኝም፡፡ ገበናው የተጋለጠ ሰው ከማንበብ ይልቅ የሚቀናው ማነብነብ ከሆነ ችግሩ ሌላ ነው፡፡ ፋሲል ያላነበበውን በማነብነቡ ችግሩ የከፋ መስሎ ታይቶኛል፡፡

እዚች ላይ አዛኝ ቅቤ አንጓቹ ፋሲል የኔዓለም “ወሰን ሳያውቀው ወይም ሆን ብሎ የአሳዳጆቹ መጠቀሚያ ሆኗል” ያለውን ላርመው እሻለሁ፡፡ በመጀመሪያ ደረጃ እኔ አሳዳጅ የለኝም፡፡ ጠላት የለኝም፡፡ የሚያሳድደኝ ካለ እሱ እውነት ብቻ ነው፡፡ እውነትን ከመናገር ደግሞ ወደኋላ አልልም፡፡ “የቃሊቲ ሚስጥሮች”ን የፃፍኩት ለመኖር ስል አይደለም፡፡ ምክንያቱም ከ97 ዓም በፊት እኖር የነበረውን ኑሮ የሚከለክለኝ ማንም የለም፡፡ መፅሐፉን በመፃፌ የማገኘውም የማጣውም የተለየ ነገር የለም፡፡ እስር ቤት ውስጥ የሆነውን የተፈጠረውን “ቁጭ” ነው ያደረግኩት፡፡ ያውም በአክብሮት ጭምር፡፡ የማንንም ስብዕና ሳልነካ፡፡ በአጭሩ “የቃሊቲ ምስጢሮች”ን የፃፍኩት የታሪካችንን ሌላ ገፅታ ለማሳየት ነው፡፡ የሀገር ታሪክ ስለሆነ ነው፡፡ ታሪክ ደግሞ ታሪክ ሊባል የሚችለው በጎውንም መጥፎንም ማሳየት ሲችል ነው ለትውልድ አስተምህሮት የሚኖረው፡፡ ከዚህ የዘለለ ዓላማም ዒላማም የለኝም፡፡ “አለባብሰው ቢያርሱ በአረም ይመለሱ” ነውና

ስድስቱ

ፋሲል የኔዓለም “የቃሊቲ ምሰጢሮች” አሁን በመፅሐፍ መልክ ታትሞ ለአንባቢያን መቅረቡ ለምን እንዳንገበገበው አልገባኝም፡፡ ምክንያቱም በ2002 ዓ.ም በእኔ አሳታሚነት ለንባብ ይቀርብ በነበረው “ሐራምቤ” ጋዜጣ ለ24 ሳምንታት በተከታታይ ተተርኳል፡፡ በተለይ እሱን የሚመለከተው ክፍል ከየካቲት እስከ ነሐሴ ወር 2002 ዓ.ም ነው በምድረ-ኢትዮጵያ ለንባብ የበቃው፡፡ አሁን በ”ሐራምቤ” ጋዜጣ ለህትመት ያልበቃው ክፍል ታክሎበት ነው መፅሐፍ ሆኖ የመጣው፡፡

የሆነ ሆኖ እኔን ከሁሉ በላይ የገረመኝ ፋሲል የኔዓለም “…. ወሰን በእኔ ላይ ያቀረበው ወቀሳ ለምን ‹በገንዘብ አልደገፈኝም› የሚል በመሆኑ ለሞራሉ መጎዳት አስተዋፅኦ አድርጌ ይሆናል..” ብሎ መዘላበዱ ነው፡፡

ቀድሞ ነገር ፋሲል የኔዓለም ምን ሆኖ፣ ምን አለውና ነው እኔን በገንዘብ የሚረዳኝ? የምን አጉል መኮፈስ ነው፡፡ እርግጥ ነው እስር ቤት ውስጥ ስድስት ወር ሳይሞላን ከእስር ተፈትቶ፣ የስደተኝነት ሊቼንሳ አግኝቶ፣ “ሳይገድሉ ጎፈሬ” እንዲሉ ያልኖረበትን የጀግንነት ካባ ደርቦ፣ ከምስኪኑ ዲያስፖራ በትግል ስም ዶላር አሰባስቦ ለመኖር ሲቋምጥ የነበረው ፋሲል የኔዓለም ነው፡፡ እንጂ እኔ አይደለሁም ፡፡ እናም ታጋይ ፋሲል ገና ምኑም ከምኑ ሳይያዝ ያለመው ተሳክቶለታል፡፡ “ወጡ ሳይወጠወጥ ወስከምቢያው ላይ ቂጥጥ” ብሏል፡፡ ይመቸው!!

ፋሲል ከእስር ቤት ሳይወጣ ባህር ማዶ ዘልቆ ጀግና ለመሆን ሲያልም፣ የእኔ ምኞት አንድ ብቻ ነበረ፡፡ ከእስር የመፈታት ዕድል ካገኘሁ ለአንድ ጊዜም ቢሆን በሙያዬ ላይ መገኘት፣ ለአንድ ጊዜም ቢሆን ጋዜጣ ማሳተም ነበር የማልመው፡፡ ህልሜንም አሳክቻለሁ፡፡ “ሐራምቤ” ጋዜጣን ለ6ወር አሳትሜአለሁ፡፡ በ”ሐራምቤ” እንደገና ተከስሼ፣ እንደገና ቃሊቲን ጎብኝቼአለሁ፡፡ ይህንንም ነፍሷን ይማርና በ”አውራምባ” ጋዜጣ ላይ ፅፌዋለሁ፡፡ የዋስትና ገንዘብ ከፍለው ከዳግም እስራት ያስወጡኝ የ”አዲስነገር” እና የ”አውራምባ” ጋዜጠኞች መሆናቸውን የምናገረው በኩራት ጭምር ነው፡፡ ይህ ማለት የምፅፈው እነፋሲል የኔዓለም ከምስኪኑ ዲያስፖራ ከሚሰበስቡት ገንዘብ እንጥብጣቢ ይወድቅልኛል ብዬ አይደለም ማለት ነው፡፡

ያኔ ብቻ አይደለም፤ አሁንም እየፃፍኩ ነው፡፡ ወደፊትም እፅፋለሁ፡፡ የምፅፈው ለማስመሰል፣ አጉል ታጋይ ለመባል፣ ለመመፃደቅ፣ ለከንቱ ውዳሴ አይደለም፡፡ የምፅፈው ለሕዝብና ለሃገር የተሻለ ምኞት ስላለኝ ነው፡፡  የምፅፈው ማንንም ተመክቼ፣ ማንንም ተገን አድርጌ አይደለም፡፡ የእኔ ተገን እና መመኪያ እውነትና እውነት ብቻ ነው፡፡ የምፅፈው ሳላፈገፈግ ነው፡፡ የሥነምግባር ትጥቅ መታጠቅ ማለት ደግሞ ይኼ ነው፡፡ እንጂ ያልተረዱትን ነገር ማንዴላ ምናምን እያሉ መደስኮር አይደለም፡፡ በዚሁ ባበቃ ነው የሚሻለው፡፡ በመጨረሻ ግን….

በመጨረሻ

“….ገምጋሚው ፋሲል በእስረኞች የተጠላ መሆኑን ከየት አመጡት? ምናልባት ወደፊት ከሚወጣ የወሰን መፅሐፍ አግኝተውት ይሆን?” ሲል በፅሁፉ ውስጥ ላቀረበው ስጋታዊ መጠይቁ ምላሽ ሰጥቼ ይህንን ፅሁፍ ልደምድም፡፡

የኢሳት ፊታውራሪ ፋሲል የኔዓለም ሆይ!! ሥጋትህ ከንቱ ነው፡፡ ወደፊት የሚታተም መፅሐፍ ቢኖረኝም እናንተን ስለማይለከት አትስጋ፡፡ ለዚህ ቃል እገባልሃለሁ፡፡ የሥጋትህ ምንጭ ግን ይገባኛል፡፡ አሁን “የቃሊቲ ምሰጢሮች” ብዬ ባሳተምኩት መፅሐፍ ውስጥ ያላካተትኳቸው እጅግ አሳፋሪ ታሪኮች እጄ ላይ እንዳሉ ጠንቅቀህ ስለምታውቅ ነው፡፡ ከኢትዮጵያ ሕዝብ አብሮ የመኖር ባህል፣ ታሪክ፣ እምነት ጋር በእጅጉ የሚጣረሱ እና የወረዱ ተግባሮችን “ሕዝብ ላይ መትፋት ነው” በሚል አጭር አገላለፅ ትቼዋለሁ፡፡ ከዚህ በላይ መውረድ፣ ከዚህ በላይ መዝቀጥ ሞት፣ የሞት ሞት ነውና፡፡

ቢሆንም ምናልባት ገንዘብ ካገኘሁ አንተ “እጅግ ውብ” ብለህ የመሰከርክላቸው ግጥሞቼን ማሳተሜ አይቀርም፡፡ ለእጮኛህ በማስታወሻነት ያበረከትኩላትን ግጥም ጭምር፡፡ በነገራችን ላይ ዘንግተህ ካልሆነ እስር ቤት የፃፍኳቸው ግጥሞች ሁለት ብቻ አይደሉም፡፡ ብዙ ናቸው፡፡ ትዝ ይልህ እንደሆነ ሁላችንም እስረኞች በምንታደምባቸው ምሽቶች “አጭር ፀሎት” የሚል ግጥም አንብቤ ነበረ፡፡ “ያቺ ፀሎቴ” በእርግጥም ሰምራልኛለችና ግጥሟን ጋብዤ ልሰናበትህ፡፡ ግጥሟ ውስጥ በእርግጥም እኔን፣ በእርግጥም ምኞቴን፣ በእርግጥም ፅናቴን፣ በእርግጥም እምነቴን ታገኘዋለህ፡፡ ይህ ብቻ አይደለም፤ በእርግጠኝነትም ታውቀኛለህ፡፡ እነሆኝ ግጥሟን ለስንብት፡-

አጭር ፀሎት

ፈጣሪ ሆይ

ረዥም ፀሎት የለኝም፣ ልፀልይ ብልም አልችልም

ለትንሣኤ ሞት አብቃኝ ብዬ አጓጉል አላስቸግርም

ይህቺኑ ዕድሜዬን በወጉ ፅናቱን ብርታቱን ስጣት

ከተገፉ ጋር አቁማት የደሀ ፍቅር ሸልማት

ይህቺኑ ዕድሜዬን አጣፍጣት – ከታሪክ መዝገብ አኑራት፡፡

ቁምነገር ማይገኝበት ረዥምና ዘልዛላ ዕድሜ

አልለምንህም ቆሜ፡፡

በትንሳዔ ለለው ህይወት በጭራሽ ቁብ አይሰጠኝም

ከሞት በኋላ ለመኖር ናፍቆት ጉጉቱ የለኝም

እንኳንስ ሁለቴ ህይወት አንዱንም መኖር ታክቶኛል

የሰው ልጅ ሥቃይ ሰቆቃ ጩኸቱ አደንዝዞኛል፡፡

ሰው በሞላበት ምድር ላይ ሰው የሚሆን ሰው ጠፍቶ

ግፍና በደል በርክቶ ሕግ ስብዕናው ሞቶ

ኤሎሄ ዋይታ እየናኘ

ሀዘን እየተቃኘ

በትንሳዔ ህይወት ፈጥረህ ዳግመኛ ከምታኖረኝ

ለድሆች አጋር መከታ እዚሁ አንደዜ ሰው አርገኝ

አሁን ባለው ህይወቴ ሰው መሀል ለሰው አቁመኝ፡፡

ይኸው ነው አጭር ፀሎቴ- ረዥም ፀሎት የለኝም

ልፀልይ ብልም አልችልም – ጌታ ሆይ አላስቸግርም

ጌታ ሆይ ሰው አርገኝ አንዴ – ይህቺኑ ህይወቴን ሸልመኝ

ያንኛው ህይወት ይቅርብኝ – ለሰው ስለሰው አኑረኝ፡፡

Share Button
Disclaimer: We are not responsible for any losses or damages that may have caused by using our services. EMF declines all responsibility for the contents of the materials stored by users. Each and every user is solely responsible for the posts.
Posted by on June 26, 2012. Filed under Uncategorized. You can follow any responses to this entry through the RSS 2.0. You can leave a response or trackback to this entry

Leave a Reply

Your email address will not be published. Required fields are marked *